चौतारा कारागारमा एक जना स्वास्थ्यकर्मीको दरबन्दी भए पनि लामो समयदेखि रिक्त हुँदा कारागारका कैदीबन्दीहरूको स्वास्थ्यमा समस्या भएको छ । विभिन्न समयको मौसमी माहामारीको सङ्क्रमण र जेलको क्षमताभन्दा बढी कैदीबन्दी राखेर उत्पन्न समस्याले कैदीबन्दीहरूको स्वास्थ्यमा देखिएका समस्याको उपचार स्वास्थ्यकर्मीको अभावमा समयमा हुन नसकेकोे हो ।

पटक पटकको अनुगमनपछिको सुझावबाट चौतारा कारागार भित्रका भौतिक संरचनामा केही सुधार भए पनि कैदीबन्दीहरूमा स्वास्थ्य परीक्षण गर्ने स्वास्थ्यकर्मी नहुँदा समस्या भएको जेलका नाइके रोहित तामाङले बताउनु भयो ।

रााष्ट्रिय मानव अधिकार आयोग, बागमती प्रदेश कार्यालयका प्रतिनिधि र इन्सेकले ०८० मङ्सिर १२ गते गरेको संयुक्त जेल अनुगमनको क्रममा चौतारा कारागारका कैदीबन्दीले आफूहरूको नियमित स्वास्थ्य परीक्षण नहुँदा स्वास्थ्यमा समस्या भएको बताएका हुन् ।

कैदीबन्दी बिरामी परेमा चौतारा अस्पतालमा पुर्‍याउनु पर्ने, अस्पतालमा पालो कुरेर बस्नु पर्ने, सुरक्षाको दृष्टिकोणले एक पटकमा तीन जना मात्र अस्पताल लैजानु पर्ने जस्ता समस्याले पनि कारागार भित्रै स्वास्थ्यकर्मी हुनु पर्ने कैदीबन्दीको माग छ । रिक्त रहेको स्वास्थ्यकर्मीको माग गरेर विभिन्न मितिमा विभागमा पत्राचार भए पनि प्रक्रिया लामो भएको जिल्ला कारागार कार्यालयका गौरव श्रेष्ठले बताउनु भयो ।

चौतारा कारागारको पुरुष बन्दी गृह ०७२ सालको भूकम्पले ध्वस्त बनाएपछि पुनःनिर्माण हुन सकेको छैन । पाँच जना महिला राख्नको लागि निर्माण भएको चौतारा कारागारमा हाल ७९ जना कैदी र ३३ जना थुनुवा गरी १ सय १२ जना कैदीबन्दी राखिएको छ । महिला थुनुवाहरू भने अन्य जिल्लाको विभिन्न कारागारमा पठाइने गरेको जेलर अनिल बुढाथेकीले बताउनु भयो ।

आफूले जेलभित्रको चौकीदारको जिम्मेवारी लिएपछि कारागार कार्यालयको सहयोगमा दुई ओटा नुहाउने धाराको निर्माण भएको र विभिन्न शीपमूलक कार्यक्रम सञ्चालन गर्नुका साथै कैदीबन्दीहरूलाई मनोपरामर्श दिलाउने उदेश्यले दैनिक योग साधना कक्षा सञ्चालन गरेको चौकीदार भिमबहादुर बस्नेतले बताउनु भयो । जेलभित्र बसेका कैदिबन्दीहरूको नियमित स्वास्थ्य परीक्षण गराउने व्यवस्था मिलाउन कारागार प्रशासनसँग सम्पर्क र समन्वय भइरहेको छ । छिट्टै स्वास्थ्य कर्मीको व्यवस्था हुने विश्वास आफूले लिएको चौकीदार बस्नेतले बताउनु भयो ।