टोखा नगरपालिका-३, धनेश्वर बस्दै आउनुभएका ४४ वर्षीय कर्ण बहादुर अधिकारीले प्रहरी कार्यालयमा परेको उजुरीका विषयमा छलफल गर्न जाँदा आफूमाथि महानगरीय प्रहरी प्रभाग नयाँ बसपार्कका इन्स्पेक्टर दिनेश गुरुङले कात्तिक १६ गते यातना दिँदै निर्घात कुटपिट गरेको आरोप लगाउनुभएको छ । इन्स्पेक्टर गुरुङको कुटपिटबाट अधिकारीको दुवै खुट्टाको पिँडौलामा निलडाम रहेको छ ।
पीडित अधिकारीका अनुसार प्रहरी कार्यालयमा नै कुटपिटपछि ज्वरो आउने र निरन्तर बान्ता आउने भएपछि बसुन्धारामा रहेकोविपी स्मृति अस्पतालमा गएर कात्तिक १८ गते उपचार गर्नुभयो ।
घटनाबारे इन्सेकलाई बताउँदै अधिकारीले आफ्ना छिमेकी मुकुन्द थपलियाले पैसा लगेर फिर्ता नदिएको र उल्टै आफूहरूमाथि उजुरी हालेको विषयमा विवाद भएपछि छलफल गर्न जाँदा आफूमाथि इन्स्पेक्टर गुरुङले प्लास्टिकको पाइपले निलडाम हुने गरी कुटपिट गरेको बताउनु भयो ।
अधिकारीका अनुसार आफ्ना छिमेकी समेत रहेका टोखा नगरपालिका-३, धनेश्वर बस्दै आएका मुकुन्द थपलियाले सापटी पैसा लागेको र उल्टै आफ्नो पैसा माग्न जाँदा आफ्नी पत्नी सुभद्रा अधिकारीसँग बादविवाद भएपछि सुरक्षा माग गर्दै महानगरीय प्रहरी प्रभाग, नयाँ बसपार्कमा उजुरी दिनुभएको थियो । सोही उजुरीका सम्बन्धमा कात्तिक १६ गते दुवै पक्षलाई प्रहरीले छलफल गर्न बोलाए पनि उजुरीकर्ता थपलिया आफ्नै नयाँ बसपार्कस्थित प्रहरी प्रभागमा नआएपछि आफूले फोनबाट उजुरी हालेर आफै छलफलमा नआउने नभनेर थपलियालाई गाली गरेपछि इन्स्पेक्टर गुरुङले आफूलाई नियन्त्रणमा लिएर कुटपिट गरेको अधिकारीले उल्लेख गर्नुभयो ।
प्रहरी कार्यालयमा नै कुटिएपछि पीडित अधिकारीले कात्तिक १६ गते नै जिल्ला प्रहरी परिसर, टेकुमा आफूमाथि कुटपिट गर्ने इन्स्पेक्टर दिनेश गुरुङमाथि कारबाहीको माग गर्दै उजुरी दिनुभएको थियो ।
उजुरीबारे इन्सेकलाई जानकारी दिँदै जिल्ला प्रहरी परिसर, काठमाडौँका प्रमुख एसएसपी भुपेन्द्र खत्रीले अधिकारीले दिएको उजुरीमाथि आन्तरिक छानबिन भइरहेको र दोषी देखिएको खण्डमा इन्स्पेक्टर गुरुङमाथि विभागीय कारबाही हुने बताउनु भयो ।
