रुकुमपश्चिममा भूकम्पले जनधनको क्षति गरेपछि भूकम्प पीडित र प्रभावित परिवारहरुले घरबाहिरै त्रिपालमुनि र खुल्ला आकाशमा दिनरात कटाउन बाध्य छन् । पीडित र प्रभावित परिवारसँगै किरिया-पुत्रीले समेत चिसो रातमा त्रिपालमूनि रात बिताउन बाध्य भएका छन् । भूकम्पबाट मृत्यु भएको ५२ जनाको अधिकांश पीडित परिवार त्रिपालमुनि नै रहेका छन् । अधिकांशका घर भत्किएको, बस्न नमिल्ने गरेर चर्किएको र फेरि भूकम्प आउने त्रासका कारण किरियापुत्रीसहितका प्रभावितहरु खुला चौरमा त्रिपाल टाँगेर बसेका हुन् ।
जिल्लाको सबैभन्दा बढी प्रभावित क्षेत्र आठविसकोट नगरपालिका– ११, १२, १३ र १४ र सानीभेरी गाउँपालिका– १ र ४ मा सयाैँ घरपरिवारले बारीमा त्रिपाल टाँगेर रात बिताउन बाध्य छन् । स्थानीय सरकार, विभिन्न संघ सस्था र राजनीतिक दल समेतले उपलब्ध गराएका त्रिपाल र केहि कम्बलको भरमा पीडितहरुले खुल्ला आकाशमा रात बिताएका छन् । जिल्लाको चौरजहारी नगरपालिका, त्रिवेणी गाउँपालिका समेतका सर्वसाधारणहरु त्रिपालमुनि रात बिताएका छन् ।
आठविसकोट नगरपालिका–११ का हरि पुनले आफ्नी सानी आमाको भूकम्पमा परेर मृत्यु भएको र सबै परिवार त्रिपालमुनि नै बसेको बताउनुभयो । चिसो रातमा पराल बिछ्याएर बस्न बाध्य भएको उहाँले जानकारी दिनुभयो । मृतकका परिवारहरु मात्र नभएर सयौँ पीडित र प्रभावित परिवारहरु त्रिपालमुनि नै बसिरहेको उहाँले बताउनु भयो।
प्रमुख जिल्ला अधिकारी हरि प्रसाद पन्तले एकद्धार प्रणाली मार्फत राहत वितरणको व्यवस्था मिलाइएको जानकारी दिनुभयो । उहाँले विभिन्न क्षेत्र र निकायबाट राहत सामाग्री प्राप्त भइरहेकोले केहि पीडितलाई कात्तिक १९ गते उपलब्ध गराइसकिएको र बाँकिलाई कात्तिक २० गते उपलब्ध गराइसक्ने उहाँले बताउनुभयो ।
