कैलारी गाउँपालिकाक वडा नम्बर ९ को वडा कार्यालयमा कात्तिक १३ गतेदेखि तालाबन्दी गरिएको कारण स्थानीय सेवाग्राहीहरु मर्कामा परेका छन् । कार्यालयमा लगाइएको तालाबन्दीका कारण कार्यालयबाट प्रदान गरिने सेवाहरु प्रभावित हुँदा सेवाग्राहीहरु समस्यामा परका छन् ।
कैलारी गाउँपालिका–९ सामरचौडाका देवीलाल चौधरीले वडाकार्यालयमा सम्पत्ति कर बुझाउन जाँदा वडा कार्यालयमा तालाबन्दी भएका कारण कर नतिरेर फर्किनु परेको गुनासो गर्नु भयो ।
कात्तिक १३ गते ज्येष्ठ नागरिकलाई सामाजिक सुरक्षा भत्ता वितरण गर्ने सूचना पाएपछि भत्ता बुझ्न बुवालाई लिएर वडा कार्यालय पुग्दा वडा कार्यालयमा ताला झुण्ड्याइएको देखेर रितैहात फर्किनु परेको नमीफाँटाका नारायण चौधरीले दुखेसो पोख्नु भयो ।
कोइलही तालको पानी उपभोग गर्न पाउनु पर्ने विषयलाई लिएर वडा नम्बर ६ का उपभोक्ताहरुले नारा जुलुस गर्दै वडा कार्यालय घेराउ गरी तालाबन्दी गरेका कारण स्थानीय सेवाग्राहीहरुलाई समस्या भएको वडा सचिव ठागुराम चौधरीले बताउनु भयो ।
वडा कार्यालयबाट प्रदान गरिने सबै सेवा ठप्प हुँदा चाडपर्वको समयमा ३ सय ७२ जना ज्येष्ठ नागरिक तथा लक्षित समुदायका व्यक्तिहरुलाई समाजिक सुरक्षा भत्ता समेत वितरण गर्न नसकिएको वडासचिव चौधरीले बताउनु भयो ।
कैलारी गाउँपालिका–९ का वडाध्यक्ष खेमराज चौधरीले समस्या समाधानका लागि वडा नम्बर ९ मा रहेको कोइलही तालको ठेक्का रकम र तालको पानी उपभोग गर्ने सम्बन्धमा वडा नम्बर ९ र ६ का उपभोक्ताहरुसँग छलफल भइरहेकोले बताउनु भयो ।
