सुनकोशी गाउँपालिका-६, थुम्पाखरमा रहेको स्वास्थ्य चौकीमा निःशुल्क वितरण गरिने औषधिहरू प्रयाप्त नहुँदा स्वास्थ्य चौकीमा उपचारको लागि आउने बिरामीहरू मार्कामा परेका छन् । उक्त ग्रामीण क्षेत्रमा रहेका स्वास्थ्य संस्थाहरूमा औषधिको अभाव हुँदा बिरामीहरूले थप सास्ती खेप्नु परेको हो ।
गाउँमा भाइरल ज्वरोको माहामारी छ, तर स्वास्थ्य चौकीमा सिटामोल समेतका औषधिहरूको अभावले स्थानीयहरू मार्कामा परेको थुम्पाखरस्थित मानव अधिकार निगरानी समूहकी संयोजक रेखा थापाले बताउनु भयो । समूहकी संयोजक थापाको भनाई अनुसार स्वास्थ्यकर्मीहरू नियमित स्वास्थ्य संस्थामा बसे पनि औषधिको अभावका कारण बिरामीहरू समस्यामा परेका छन् । स्वास्थ्य चौकीमा औषधिको अभाव भएपछि बिरामीहरू स्थानीय मेडिकलमा गएर औषधि किन्न बाध्य भएका छन् ।
स्वास्थ्य चौकीहरूमा औषधिको व्यवस्थापन गर्ने जिम्मेवारी स्थानीय सरकारको भएकाले जिल्लाबाट औषधि पठाउन नसकिएको जिल्ला जनस्वास्थ्य प्रमुख अनुप अधिकारीले बताउनु भयो । स्वास्थ्य चौकीमा औषधिको अभाव भएको बारे सुनकोशी गाउँपालिका-६ का वडा अध्यक्ष चक्र बस्नेतसँग जिज्ञासा राख्दा औषधिको व्यवस्थापन केही हप्ताभित्र नै प्रयाप्त मात्रामा हुने बताउनु भयो ।
नेपालको संविधान २०७२ को मौलिक हक अन्तर्गत धारा ३५ को उपधारा १ मा प्रत्येक नागरिकलाई आधारभूत स्वास्थ्य सेवा निःशुल्क प्राप्त गर्ने अधिकारको सुनिश्चितता गरिएको भए पनि थुम्पाखरमा रहेको स्वास्थ्य चौकीमा औषधि समेत नपाउँदा बिरामीहरू समस्यामा परेका छन् ।
