काठमाडौंको गोठाटारमा प्रहरीले गोली चलाउँदा लागुऔषध कारोबारी घाइते भएका छन् । प्रहरीले चलाएको गोली दाइने तिघ्रामा लागेर एक भारतीय नागरिक घाइते भएका हुन् ।
ब्राउनसुगर कारोबारी भन्ने थाहा पाएपछि प्रहरीले उनलाई पक्राउ गर्न खोजेको थियो । तर प्रहरीमाथि नै आक्रमणमा उत्रिएपछि प्रहरीले जवाफी फायर गरेको हो । काठमाडौं उपत्यका अपराध अनुसन्धान कार्यालयको टोलीले गोली चलाएर दुइ जना लागु औषध कारोबारीलाई पक्राउ गरेको हो । लागु औषध कारोबारी झापाका अर्घ लिम्बु र भारतको पश्चिम बंगाल घर भएका मोहम्मद करिमलाई हतियारसहित पक्राउ गरिएको कार्यालयका प्रहरी उपरीक्षक रविन्द्र रेग्मीले जानकारी दिनुभयो ।
गोली लागेको मोहम्मदको गोठाटारस्थित कान्तिपुर अस्पतालमा उपचार भइरहेको उहाँले बताउनुभयो । उनको साथबाट तीन राउण्ड गोलीसहित एक थान पेस्तोल र २ सय ग्राम खैरो हिरोइनसहित तराजु बरामद गरिएको एसपी रेग्मीले जानकारी दिनुभयो । यसअघि २८ जेठमा पनि प्रहरीको लागूऔषध नियन्त्रण ब्यूरोले गोली हानेर एक जना लागूऔषध कारोबारीलाई समातेको थियो ।
