वीरेन्द्रनगर नगरपालिका– ६ को मुख्य बजार क्षेत्रमा रहेको उषा बालवाटिका माध्यमिक विद्यालयको होस्टेलमा आठ वर्षीय बालक झुण्डिएको अवस्थामा मृत भेटिएपछि आफन्तले दोषीलाई कारबाहीको माग गरेका छन् ।
स्कुलको घण्टाघर नजिककै रहेको होस्टेलमा असोज १२ गते राति चामुण्डा बिन्द्रासैनी नगरपालिका दैलेखका ८ वर्षीय सलाम पुलामी मगर झुण्डिएको अवस्थामा मृत भेटिएका थिए । मृतक बालक कक्षा २ मा पढ्थे । मृत्यु शंकास्पद रहेको भन्दै आफन्तहरु आन्दोलन गदै सडकमा उत्रिएका हुन् ।
‘मृतकका आफन्तहरुसँग छलफल भइहरेको छ । उहाँहरु सहमतिमा पनि आइसक्नुभएको छ । तर केही बाहिरका व्यक्तिहरु आन्दोलनमा घुसेर उग्र बनाउने काम भइरहेको छ’ प्रजिअ सापकोटाले भन्नुभयोे, ‘हामीले आवश्यक प्रहरी फोर्स परिचालन गरेका छौं । आन्दोलनलाई शान्त पार्ने काम भइरहेका छन् ।’ घटनास्थलको मुचुल्का गरेर शव उठाउने तयारी गरिएकोे जिल्ला प्रहरी कार्यालय सुर्खेतका प्रमुख एसपी योगेन्द्रसिंह थापाले बताउनुभयो ।
घटनाको छानबिन गर्नुपर्ने भन्दै आक्रोशित भिड तोडफोडमा नै उत्रिएपछि भिडलाई साम्य पार्न प्रहरीले अश्रु ग्याँस समेत प्रहार गरेको थियो । प्रहरी र आन्दोलनकारीबिच झडपले उषा विद्यालयको परिसर तनावग्रस्त बनेको थियो ।
