सिंजा गाउँपालिका – ३ नराकोटस्थित इलाका प्रशासन कार्यालयबाट नागरिकता नपाएको सेवाग्राहीले गुनासो गरेका छन् । सिंजा क्षेत्रका तीन ओटा गाउँपालिका हिमा, सिंजा र कनकासुन्दरीका नागरिकले इलाका प्रशासन नराकोटबाट नागरिकता वितरण हुर्दै आएको थियो ।
कामु शाखा अधिकृत नायव सुव्बा सुरत गिरीको सरुवा भएपछि इलाका प्रशासन कार्यालय नराकोट शाखा अधिकृत विहीन भएको हो । इलाका प्रशासन कार्यालयमा कर्मचारीविहीन भएपछि एक सातादेखि सेवाग्राहीले नागरिकता पाउन सकेका छैनन् ।
स्थानीय दलविर रोकायाका अनुसार वर्षा यामको समयमा भौगोलिक बिकटता र कठिनाइका साथ सेवा लिन आएका सेवाग्राही सेवा पाउने गरेका छैनन् । उहाँले भन्नुभयो ‘कर्मचारीविहीन इलाका प्रशासनबाट सेवाग्राहीले नागरिकता पाउने गरेका छैनन् । एक सात देखि सेवाग्राही इलाका प्रशासनमा आएर सेवा नपाएरै फर्किेन गरेका छन् । ’
कर्मचारी नभएरै सिंजा गाउँपालिका–३ नराकोटस्थित इलाका प्रशासन कार्यालयबाट सेवाग्राहीले नागरिकता नपाउनु दुखद् पक्ष हो । यस विषयमा आयोगको ध्यानाकर्षण भएको राष्ट्यि मानवअधिकार आयोग शाखा कार्यालय जुम्लाका प्रमुख धनराज शाहीले बताउनु भयो । उहाँले भन्नुभयो ‘सिंजा क्षेत्रका तीन गाउँपालिकाका नागरिकले इलाका प्रशासन नराकोटबाट नागरिकता प्राप्त गर्दै आएका थिए । एक सातादेखि इलाका प्रशासनबाट नागरिकता वितरण नभएको र जिल्ला प्रशासन कार्यालयबाट नागरिकता वितरण गर्न जानकारी प्राप्त भएका छ । ’
तत्काल इलाका प्रशासनमा कर्मचारीको व्यवस्थापन गरी नागरिकता वितरण गर्न वातावरण सिर्जना गर्न जिल्ला प्रशासन कार्यालय, गृहमन्त्रालयलाई पत्रचार गरी ध्यानाकर्षण गरिएको प्रमुख शाहीले बताउनु भयो । १० दिन अघि इलाका प्रशासनमा रहेका कामु शाखा अधिकृत नायव सुव्बा सुरत गिरीको सरुवा भयो । ६ महिनाका लागि इलाकामा खटाएको थियो । अहिले उहाँको सरुवा भएपछि इलाका प्रशासनमा कर्मचारी शाखा अधिकृतविहीन भएको हो । इलाका प्रशासनमा कर्मचारीविहिन भएपछि अहिले जिल्ला प्रशासन कार्यालयबाटै नागरिकता वितरणको कार्य भइरहेको प्रमुख जिल्ला अधिकारी जयकुमार घिमिरेले जानकारी दिनुभयाे।
यस विषयमा गृहमन्त्रालयमा पनि पत्रचार गरिएको छ । इलाका प्रशासनमा कर्मचारी सरुवा भएर नआउन्जेलसम्म समस्या हुने देखिएको प्रमुख जिल्ला अधिकारी घिमिरेले बताउनु भयो । इलाका प्रशासन कार्यालय नरोकाटबाट सेवा लिने सिंजा क्षेत्रको जनसङ्ख्या हिमा गाउँपालिकामा १२ हजार १ सय ९१ जना, कनकासुन्दरीमा १३ हजार ६सय २५ जना र सिंजा गाउँपालिकामा १२ हजार ५सय ५६ जना रहेका छन् ।
