अविरल वर्षातका कारण ठाउँठाउँमा पहिरो जाँदा उत्तरी धादिङमा रहेका स्थानीय बासिन्दाको जनजीवन प्रभावित बनेको छ । वर्षातका कारण नदी तथा खोला र नालामा पानीको बहाव बढेपछि सडक बाटो कटान गर्नुका साथै धनजनको क्षति पुर्याएको हो ।उत्तरी धादिङको तिप्लिङसम्म सदरमुकाम धादिङबेसीले जोड्ने सडकको ठाउँठाउँमा पहिरो जाँदा मानिस डिँड्ने बाटो समेत बन्द भएको छ । पहिरोले बाटो बन्द भएका कारण रुबिभ्याली गाउँपालिका र झार्लाङसँग यातायात सम्पर्क विच्छेद भएको छ ।
खनियाबास गाउँपालिका-१ को पेर्चो र लिस्ने खोलाको बीचमा पर्ने जुगाडाँडा, पेर्चोमा पहिरो गएपछि यातायातमात्र होइन मानिससमेत हिँड्न नसकिने गरी आवतजावत बन्द भएको रुबीभ्याली गाउँपालिकाका स्थानीय समिर गुरुङले बताउनु भयो ।अहिले अवरुद्ध भएको स्थानमा करिब १२ वर्षअघि पनि पहिरो खसेको थियो । फेरि सोही स्थानमा खसेको पहिरोले स्थानीय बासीको खेतसमेत पुरेको छ । आवतजावत बन्द हुँदा लापा, सेर्तुङ, तिप्लिङ लगायतका स्थानका मानिससदरमुकाम आउन नसक्ने अवस्थामा पुगेका छन् ।
पहिलो पटकको पहिरोले भासिएको जमिन पुनः पहिरो जाँदा बग्न थालेपछि छापचेत गाउँ पनि जोखिममा परेको छ । पहिरोले बिजुलीको पोलहरू लडेका छन् । आँखु खोला किनारबाट सुरु भएको पहिरो सडकबाट करिब ७० मिटर माथि पुगेको छ । त्यसभन्दा केही माथि रहेको छापचेतका ४५ घर जोखिममा परेको स्थानीय एलिया तामाङले बताउनु भयो ।
पानी नपरेको बेला रुबिभ्यालीतर्फ आउजाउ गर्नेहरू जोखिममा परेका छन् । भारी बोकेर हिँड्नेहरूले भने प्लेङयर्तोङको बाटो हुँदै हिँड्नु पर्ने बाध्यता छ । खनियाबास गाउँपालिकाको धार्नामा पहिरो गएपछि मानिसको आवतजावत समेत बन्द भएको छ । नदी किनरबाट माथि गाउँसम्म पहिरो गएपछि कच्ची सडक बगेको छ ।
वर्षा लागेपछि पहिरो जाने र सडक बन्द हुने हुँदा उत्तरका बासिन्दालाई उक्त सेवा लिन कठिन भएको रुबीभ्यालीका स्वास्थ्य शाखा प्रमुख राज तामाङले बताउनु भयो । मानिससमेत हिँड्न नसकिने ठाउँ भएकोले बिरामी बोकेर लान नसकिने अवस्था रहेको छ । सक्नेले हेलिकप्टर चार्टर गरेर लान्छन् तर गरिबहरू घरमै बसेर मर्ने अवस्था आएपनि सङ्घीय, प्रदेश र स्थानीय सरकारले सडकको भरपर्दो काम बर्षौँदेखि नगर्दा जनताले दुख पाएका हुन् ।
धादिङबेसी तिप्लिङ सडक २०४३ देखि बनाउन थालिएपनि हालसम्म पिच भएको छैन । अरबौँ रुपियाँ खर्च गरिएपनि हरेक वर्ष ठेकेदार कम्पनीले काम नसकेर म्याद थप्ने र काम अपुरोहुँदै वर्षले बगाउने गरेपछि सडक पुरा नभएको हो ।पुल हाल्नै पर्ने आँखु, दार्खाफेदी, लिस्ने लगायतका खोलामा पुल हाल्ने पहल भएको छैन । सडकमा राजनीतिक भाषण मात्र भएको र सडक कहिल्यै नबनाइएको स्थानीय बासीले बताएका छन् ।
