यमुनामाई गाउँपालिका–५ सरवठा का हिमालय टेलिभिजन रौतहट संवाददाता २९ वर्षीय राकेश यादवलाई बृन्दावन नगरपालिका–१ रमौली बैरिया घाटमा शिवम क्रसर उद्योगमा रिपोर्टिङ्ग गर्ने क्रममा सोही उद्योगका कर्मचारीले कुटपिट तथा दुर्व्यवहार गरेका छन् ।
शिवम क्रसर उद्योगले मापदण्ड विपरीत खोला उत्खनन गर्नुका साथै वातावरण प्रदुशण गरेको स्थानीयको गुनासोको आधारमा भदौ ४ गते रिपोर्टिङ्ग गर्न क्रसर उद्योग पुगेका पत्रकार यादवमाथि सोही उद्योगका कर्मचारीहरूले दुर्व्यवहार तथा कुटपिट र क्यामेरा समेत फुटाइदिएको पीडित पत्रकार यादवले बताउनु भयो ।
कुटपिट घटनामा संलग्न क्रसर उद्योगका आरोपित कर्मचारीहरू महोतरी जिल्ला बर्दिबास नगरपालिका–१४ का ३६ वर्षीय राजदेव ठाकुर, सर्लाहीको बरहथवा नगरपालिका–१८ का ३८ वर्षीय महेश चौधरी, बृन्दावन नगरपालिका–४ का ४२ वर्षीय राधेश्याम यादवविरुद्ध पीडितले भदौ ४ गते इलाका प्रहरी कार्यालय गरुडामा दिएको उजुरीको आधारमा आरोपितहरूलाई सोही दिन गिरफ्तार गरी अनुसन्धान प्रक्रिया अगाडि बढाएको इलाका प्रहरी कार्यालयका डिएसपी ओमप्रकास खनालले बताउनु भयो । साथै कुटपिटबाट घाइते भएका पीडित पत्रकारको चन्द्रपुर स्थित सिमस अस्पतालमा उपचार भइरहेको उहाँले बताउनु भयो ।
पत्रकार यादवमाथी भएको कुटपिटको घटनाको नेपाल पत्रकार महासंघ रौतहट शाखा, प्रेस चौतारी, प्रेस युनियन, प्रेस सेन्टर लगायतले भदौ ४ र ५ गते प्रेस विज्ञप्ति जारी गरी घटनाको निन्दा एवं भर्त्सना गर्दै खेद प्रकट गरेको छ । साथै सोही विज्ञप्ति मार्फत दोषीलाई कारबाहीको मागसमेत गरेको छ ।
