२४ औं अन्तर्राष्ट्रिय युवा दिवसको अवसरमा सिरहामा साउन २६ गते विभिन्न कार्यक्रम सहित समपन्न भएको छ ।

भगवानपुर गाउपालिका, इन्सेक सिरहा, ओरेक नेपाल, जिल्ला प्रहरी कार्यालय सिरहा, दलित जनकल्याण युवा कल्ब, मुक्ति नेपाल, राष्ट्रिय युवा परिषद, समग्र जनउत्थान केन्द्र, महिला मानवअधिकार रक्षक संजाल, सहयोगी हातहरू, अपाङ्ग पुनर्स्थापना केन्द्र, जीवन ज्योती समाज, साथ साथ सिकाई संजाल, मेची महाकाली बुहारी संयुक्त आवाज, सामुदायिक प्रहरी सेवा केन्द्र लगायत संघ संस्थाको आयोजनामा आयोजित कार्यक्रममा एक किलोमिटर लामो मानव साङ्गलो निर्माण गरी कोण सभा गरिएको थियो ।

कोण सभामा जिल्ला समन्वय समितिका सभापति दिनेश कुमार महतोले “अहिले देशमा जताततै बेथिति, भ्रष्टाचारहरू मौलाई रहेको छ, भ्रष्टाचार नियन्त्रणमा युवाहरू अगाडि आउने हो भने भ्रष्टाचार निर्मुल हुने” बताउनु भयो । विभिन्न कुलतहरूमा नफसि विकासको काममा अगाडि बढ्नु पर्ने बताउनु भयो । देश विकास गर्ने हो र देशमा सुशासन ल्याउन सबै राजनीति दलहरूले युवाहरूलाई जिम्मेबार पदमा अगाडि ल्याउनु पर्ने बताउनु भयो । त्यसैगरी भगवानपुर गाउपालिकाका अध्यक्ष उग्रनारायण यादवले लागु औषध देशकै लागि खतरा भएको र खतराबाट मुक्त गराउन युवाहरू अगाडि आउनु पर्ने बताउनु भयो ।

बोर्डर छेउमै मानव साङ्गलो निर्माण गरी भारतबाट ओसारपसार हुने लागु औषधले नेपालको युवाहरूमा नकारात्मक असर पुगेको र यसलाई भारत पक्षले कडाइका साथ रोकथाम गर्नु पर्ने सन्देश पुगेको बताउदै विकास र सचेतनामुलक कार्यहरूमा संघ संस्थाहरू सँग सहकार्य गरी हगाडि बढ्ने प्रतिबद्धता गर्नु भएको थियो । जिल्ला प्रहरी कार्यालय सिरहाका डिएसपी रविन्द्र राज पाण्डेले लागुऔषध विरुद्ध ऐन कानूनका विषयमा छलफल गराउनु भएको थियो । लागु औषधबाट युवालाई बचाउन सबैको सहकार्य आवश्यक रहेको बताउनु भयो ।

कार्यक्रममा भगवानपुर गाउपालिकामा एसइइमा उत्कष्ट अङ्क ल्याइ पास भएका छात्र छात्राहरूलाई प्रशंसा पत्र प्रदान गरीएको थियो ।