सरकारले ०८० साउन १७ गते जिल्ला प्रहरी परिसर, काठमाडौँ बाहिर धर्नामा प्रहरीले बल प्रयोग गरेको घटनाबारे छानबिन गर्न पाँच सदस्यीय छानबिन समिति गठन गरेको छ । अधिवक्ता भगवती पाण्डेले दिएको अभिव्यक्तिविरूद्ध उहाँलाई गिरफ्तार गर्नुपर्ने मागसहित तामाङ र मगर समुदायले जिल्ला प्रहरी परिसर, टेकुमा गरेको विरोध प्रदर्शनका क्रममा झडप हुँदा सात जनाभन्दा बढी आन्दोलनकारी घाइते भएका थिए भने गिरफ्तारीमा परेकाहरूले प्रहरीले आफूहरूलाई निर्मम कुटपिट गर्दै हिरासतमा राखेर यातना दिएको आरोप लगाएका थिए ।
गृह मन्त्रालयका प्रवक्ता सहसचिव नारायणप्रसाद भट्टराईका अनुसार गृह मन्त्रालयका उपसचिव रामबहादुर शाहीको संयोजकत्वमा पाँच सदस्यीय छानबिन समिति गठन गरिएको हो । छानबिन समितिलाई घाइते भएका व्यक्तिबारे सत्यतथ्य छानबिन गरी प्रतिवेदन पेश गर्न १० दिनको समय तोकिएको छ । समितिमा जिल्ला प्रशासन कार्यालय, काठमाडौँ, उपत्यका प्रहरी कार्यालय र राष्ट्रिय अनुसन्धान विभागका प्रतिनिधि सदस्य रहेका छन् ।
त्यस्तै गृह मन्त्रालयले कारागार कार्यालय सङ्खुवासभासभाका कैदीहरू विनोद तोलाङ्गी र विकास श्रेष्ठ भनिने आकाश बलामीको ०८० साउन २४ गते कारागारभित्रै मृत्यु भएका घटनाका सम्बन्धमा समेत सत्यतथ्य जाँचबुझ गरी प्रतिवेदन पेस गर्न कारागार व्यवस्थापन विभागका निर्देशक कमलप्रसाद पाण्डेको संयोजकत्वमा गठित पाँच सदस्यीय छानबिन समिति गठन गरेको छ ।
समितिमा नेपाल प्रहरी, राष्ट्रिय अनुसन्धान विभाग र जिल्ला प्रशासन कार्यालय सङ्खुवासभा र कारागार कार्यालय सङ्खुवासभाका प्रतिनिधि सदस्य रहने जनाइएको छ । समितिलाई सत्यतथ्य छानबिन गरी प्रतिवेदन पेश गर्न १० दिनको समय तोकिएको छ ।
