नेकपा माओवादी केन्द्रका उपमहासचिव जनार्दन शर्मा धुम्बाराही पुगेका थिए । देउवा प्रधानमन्त्री हुँदा शर्मा विश्वासिला अर्थमन्त्री थिए । डेढ वर्षकाे सहकार्यले देउवा-शर्माको सम्बन्ध निकै राम्रो छ । भेटमा के-के कुराकानी भयो भन्नेबारे विस्तृत कुरा बाहिर आइसकेको छैन ।
भेटमा उपमहासचिव शर्माले माओवादी केन्द्रका अध्यक्ष पुष्पकमल दाहाल प्रचण्ड नेतृत्वकाे सरकारलाई समर्थन गरेर राष्ट्रिय सहमतिको सरकार बनाउन प्रस्ताव गरेको देउवानिकट केन्द्रीय सदस्य नैनसिंह महरले शिलापत्रलाई बताए ।
उनले भने, ‘बुधबार जनार्दन शर्माले सभापतिज्यूलाई भेट्नु भएको थियो । भेटमा प्रचण्ड नेतृत्वको सरकारलाई समर्थन गर्ने प्रस्ताव गर्नुभयाे । सभापति देउवाले सकारात्मक जवाफ दिनुभएको छ । आवश्यक परे कांग्रेसले समर्थन गर्न पनि सक्छ ।’
‘बुधबार सभापति र शर्माको भेटवार्ताले पनि यो सरकारप्रति सभापतिज्यू सफ्ट हुनुहुन्छ । माओवादी कांग्रेस एक-अर्काको सहयोगले चुनाव जितेका हौँ । हाम्रो भोटले माओवादीले सरकारको नेतृत्व गरेको हो । तलका कार्यकर्ता अहिले पनि माओवादीसँग गठबन्धन भत्काएकोमा असन्तुष्ट नै छन् । त्यही भएर यो सरकारलाई समर्थन गर्न कांग्रेसलाई कुनै अप्ठ्यारो छैन ।’
नेपाल पत्रकार महासंघसँगको छलफलमा प्रधानमन्त्री प्रचण्डले पुरानो गठबन्धनका नेताहरूसँग समेत आफ्नो राम्रो छलफल चलिरहेको र सम्बन्ध सुमधुर नै रहेको प्रतिक्रिया दिएको सहभागी एक पत्रकारले बताए । प्रधानमन्त्री प्रचण्डलाई अहिले नेकपा एमाले, रास्वपा, जसपा, राप्रपा, जनमत पार्टी र नागरिक उन्मुक्ति पार्टीले साथ दिएका छन् । प्रचण्ड सात दलको समर्थनमा १० पुसमा प्रधानमन्त्रीमा नियुक्त भएका हुन् ।
