भारतीय संसद्को तल्लो सदनमा ६२ सिटसहित उनीहरूकै समर्थनमा सिंह सरकार टिकिरहेको थियो। प्रधानमन्त्रीले सम्झौता अघि बढाए समर्थन फिर्ता लिने चेतावनी वाम मोर्चाले दिएको थियो।
यद्यपि सिंहले अन्ततः जोखिम मोल्दै संसद्मा अन्य दलहरूको समर्थन जुटाउन सफल भए। कम्युनिस्टहरूको विरोधका बाबजुद सम्झौता अघि बढाइयो। तर, त्यो क्षण भारतमा वामपन्थी राजनीतिको प्रभावको उच्चतम बिन्दु थियो।
विभिन्न राज्यको चुनावको प्रारम्भिक नतिजा अनुसार वामपन्थीहरू केरलाको सत्ताबाट बढारिएका छन्। यो दक्षिणी राज्य विश्वमै पहिलोपटक लोकतान्त्रिक रूपमा कम्युनिस्ट सरकार निर्वाचित भएको राज्य थियो र भारतमा वामपन्थीहरूको शासन रहेको यो नै अन्तिम राज्य थियो।
मुख्य राष्ट्रिय विपक्षी दल कांग्रेसको नेतृत्वमा रहेको युनाइटेड डेमोक्रेटिक फ्रन्ट (यूडीएफ) ले १४० सिटको विधानसभामा दिउँसो ढिलोसम्म १०२ सिटमा जित वा अग्रता हासिल गरिसकेको थियो। केरलामा वामपन्थी दलहरूको गठबन्धन लेफ्ट डेमोक्रेटिक फ्रन्ट (एलडीएफ) ले ३५ सिटमा मात्र जित वा अग्रता कायम गरेको थियो।
यो राज्य लामो समयदेखि वामपन्थी राजनीति र विचारधाराको गढ रहँदै आएको छ। सन् १९५० को दशकको अन्त्यतिर यसले विश्वलाई नै पहिलो निर्वाचित कम्युनिस्ट सरकार दिएको थियो। अप्रिल १९५७ देखि जुलाई १९५९ सम्म कम्युनिस्ट पार्टी अफ इन्डिया (सीपीआई) ले केरलाको नेतृत्व गरेको थियो। उनीहरूले भूमि र शैक्षिक सुधार सुरु गरेपछि कांग्रेस नेता तथा भारतका पहिलो प्रधानमन्त्री जवाहरलाल नेहरूको सरकारले उक्त कम्युनिस्ट सरकारलाई बर्खास्त गरिदिएको थियो।
सन् १९७७ यता भारतको कम्तीमा एउटा राज्यमा सधैँ वामपन्थीहरूको शासन रहँदै आएको थियो। तर, अब त्यस्तो रहेन।
नयाँ दिल्लीस्थित थिंक ट्याङ्क सेन्टर फर पोलिसी रिसर्च (सीपीआर) का फेलो तथा राजनीतिशास्त्री राहुल बर्माले अल जजिरासँग भने, ‘यस वर्षको चुनावी नतिजाले पहिलोपटक वामपन्थीहरू कुनै पनि राज्यको सत्तामा नआउन सक्ने संकेत गरेको छ।’
