एमाले धनकुटाले प्रतिनिधिसभा सदस्य निर्वाचनमा पार्टीलाई असहयोग गरेको आरोपमा साँगुरीगढी गाउँपालिकाकी उपाध्यक्ष मुना राईलाई पार्टीबाट निष्कासन गरेको छ ।पार्टी गतिविधिविपरीत काम गरेको आरोप लगाउँदै जिल्ला कमिटीको विस्तारित बैठकले राईलाई निलम्बन गर्ने निर्णय गरेको एमाले धनकुटाका प्रचार विभाग प्रमुख रविन कट्टेलले बताए ।
अन्तर्घात गरेको विषय जिल्ला कमिटी बैठकमा विषय उठेपछि उपाध्यक्ष राईमाथि कारबाही गरिएको हो । राई ०७९ को स्थानीय तह निर्वाचनमा एमालेबाट साँगुरीगढी गाउँपालिकाको उपाध्यक्ष पदमा निर्वाचित भएकी थिइन् ।
आफूलाई गरिएको भनिएको कारबाहीबारे प्रतिक्रिया दिँदै साँगुरीगढी गाउँपालिका उपाध्यक्ष राईले हालसम्म औपचारिक जानकारी प्राप्त नभएको बताइन् । उनले लामो समयदेखि आफूलाई कारबाहीको नाममा दबाब दिने प्रयास भएको बताउँदै यदि कारबाही भएको हो भने त्यसलाई स्वाभाविक रूपमा लिने बताइन् ।
सो बैठकले प्रतिनिधिसभा निर्वाचनका क्रममा पार्टीविरुद्ध अन्तर्घात गरेको आरोप लागेका कार्यकर्तामाथि कारबाही गर्न नेता भीम राईको संयोजकत्वमा तीन सदस्यीय छानबिन समिति गठन गरेको एमालेले जनाएको छ ।
