कोरियामा रहेको जातीय संस्था तमू धीं ख्यङ्साङ्नाम्दो बुसान शाखाले धादिङ जिल्लाको निलकण्ठ नगरपालिका २ चिसापानी स्थित गुरुङ समुदायको पुरोहित, लामा र गुरु पुर्नउत्थानका लागि करिब असी हजार रुपैंया सहयोग गरेको छ । गुरुङ समुदायको विश्वास, प्रचलन र परम्परामा आधारित धार्मिक विषयलाई पक्षपोषण गर्ने उद्धेश्यले गत बुधबार सो रकम हस्तान्तरण गरिएको हो ।
बदलिंदो युग, आधुनिकिकरण र परिवेशले प्रभाव पारिरहेको गुरुङ समुदायको संस्कारिक गतिविधिहरुको संरक्षण गर्न र लोपोन्मुख सामाग्रीहरुको जुटाउन सहज होस् भन्ने अभिप्रायले आर्थिक संकलन गरिएको अभियानका संयोजक एवं तमू धीं ख्यङ्साङ्नाम्दो बुसान शाखाका उपाध्यक्ष गीतासिंह गुरुङले बताए । सो रकमले नयाँ लामा, गुरु, पुरोहित उत्पादन गर्नका लागि खर्च गरिने, गुफा बस्ने अर्थात् घोम्मर राख्ने प्रक्रियाको आवश्यक सामाग्री किन्ने बताईएको छ । “संस्कार जोगाऔं संस्कृति जोगाऔं, लामा गुरु, पुरोहित जोगाऔं” अभियानका अभियन्ता सुनिल गुरुङले आफ्नो समुदायको प्रक्रिया अनुसार कुनै शुभकार्य, कर्म काण्डको र पितृ कार्य (अर्घौ) कार्यको लागि आफूहरु सदैव तत्पर रहेको जानकारी दिए । कार्यक्रममा जनजागरण तमू समाज सिम्लेका सचिव पूर्ण बहादुर गुरुङ, कोषाध्यक्ष मोती गुरुङ लगायतका समाजका विशेष व्यक्तित्वहरुको उपस्थितिमा सो रकम हस्तान्तरण गरिएको हो ।
तमू धीं ख्यङ्साङ्नाम्दो बुसान शाखाका अध्यक्ष कर्ण गुरुङले प्रवासमा रहेर पनि संस्थाले आफ्नो जातीय मौलिक परम्परा, संस्कार, संस्कृतिको संरक्षण र सम्बर्द्धनमा प्रत्यक्ष, अप्रत्यक्ष टेवा पुर्याईरहेको सन्दर्भ उल्लेख गर्दै यस अघि मोरङको पत्थरी शनिश्चरमा तमू भाषाको कक्षा सञ्चालन गर्न तीन लाख रुपैंयाको अक्षय कोष स्थापना गर्नुको साथै तत्काल तमू भाषाको कक्षा सञ्चालन गर्न पचास हजार रुपैंया प्रदान गरिसकेको स्पष्ट पारे ।
