✍️ दृश्य अधिकरी

अन्तर्राष्ट्रिय शिक्षा दिवस (International Education Day) को अवसरमा Gen Z Red Force Nepalको आयोजनामा माघ १० गते काठमाडौंमा शान्ति प्रदर्शन तथा प्रेस–मिट सम्पन्न भयो। शिक्षा सुधारका मुद्दालाई केन्द्रमा राखेर आयोजित कार्यक्रममा देशभरका Gen Z युवाहरूको उल्लेख्य उपस्थितिसहित विभिन्न वक्ताहरूले आफ्नो धारणा राखे।

कार्यक्रमको सञ्चालन बागमती प्रदेश सह–संयोजक सुवर्णा लामाले गर्नुभयो। सुरुवाती सम्बोधनमा उहाँले शिक्षा क्षेत्रमा आवश्यक संरचनात्मक सुधार, युवा सहभागिता र नीति कार्यान्वयनको प्रभावकारिताबारे प्रकाश पार्नुभयो।

उहाँपछि अश्मिता खत्रीले शैक्षिक असमानता, पहुँच र गुणस्तर सुधारका विषयमा धारणा व्यक्त गर्दै युवा पुस्ताले उठाउनुपर्ने मुद्दाहरू स्पष्ट रूपमा प्रस्तुत गरिन्। उनका भनाइ भिडियोमार्फत सार्वजनिक गरिने आयोजकले जनाएको छ।

त्यसपछि भक्तपुर जिल्ला संयोजक करुणराज गिरिले स्थानीय तहमा शिक्षा सुधारका चुनौतिहरू र त्यसका सम्भावित समाधानबारे विस्तृत रूपमा बोल्नुभयो।

कार्यक्रममा केन्द्रिय संयोजक स्मृति तिमल्सिनाले संगठनले अगाडि सारेका प्रमुख शैक्षिक एजेन्डाबारे व्याख्या गर्दै आगामी दिनमा युवाहरूबीच अझ व्यापक अभियान चलाइने जानकारी दिइन्।

तत्पश्चात् संगठनका प्रवक्ता लेओ कमरेडले शिक्षा नीति, बजेट, कार्यान्वयन प्रक्रिया तथा विद्यार्थी हितका मुद्दाहरूमा सरकार जिम्मेवार बन्नुपर्ने आवश्यकता औंल्याए।

केंद्रिय सदस्य सरोज खड्काले शिक्षा राष्ट्र निर्माणको मेरुदण्ड भएकाले शान्तिपूर्ण तर सशक्त दबाबमार्फत परिवर्तन सम्भव हुने उल्लेख गरे।

अन्त्यमा सुवर्णा लामाले नै समापन वक्तव्य राख्दै सबै सहभागी, युवा साथीहरू र कमरेडहरूलाई धन्यवाद दिँदै शिक्षा सुधारका लागि Gen Z Red Force Nepal निरन्तर संघर्षरत रहने प्रतिवद्धता व्यक्त गर्दै कार्यक्रम औपचारिक रूपमा सम्पन्न गर्य।