११ असार, काठमाडौं: भक्तपुरको सूर्यविनायक नगरपालिका-४ दधिकोटस्थित डिल्ली राउतको घरबाट २ करोड रुपैयाँ लुटिएको घटनामा प्रहरी हवल्दार समेत संलग्न रहेको खुलासा भएको छ। काठमाडौं उपत्यका अपराध अनुसन्धान कार्यालयले राउतका मामा कुलबहादुर खत्रीसहित चार जनालाई पक्राउ गरेको छ।
पक्राउ परेकामा सिन्धुपाल्चोकका सुजन रसाइली (३०), भीमबहादुर तामाङ (३१), कृष्णबहादुर बोहरा (३८), र ओखलढुंगाका मुनाराज राई (३६) छन्। कृष्णबहादुर बोहरा नेपाल प्रहरीका हवल्दार हुन्, जो हाल सशस्त्र प्रहरी गण महाराजगञ्जमा कार्यरत छन्।
डिल्ली राउतले विदेश पठाउने योजनामा नगद संकलन गर्ने जानकारी पाएका कुलबहादुर खत्रीले लुटपाट योजना बनाएर सुजन रसाइलीलाई सुनाएका थिए। सुजनले यो योजना भीमबहादुर र प्रहरी हवल्दार कृष्णबहादुरलाई सुनाए। ४ असारमा हवल्दार कृष्णबहादुरले दिउँसो छुट्टी लिएर दधिकोट पुगेर लुटपाटको घटना घटाएका थिए।
लुटपाटका क्रममा हवल्दार कृष्णबहादुरले सीबीआईको प्रहरी भन्दै आफ्नो नक्कली आईडी कार्ड देखाएका थिए। लुटिएको रकम माकलबारीस्थित भीमबहादुरको कोठामा लगेर बाँडफाँट गरिएको थियो। कुलबहादुरले आधा रकम लगे भने बाँकी रकम ३० लाख सुजनले, र बाँकी ३ जनाले २० लाखको दरले बाँडेका थिए।
हवल्दार कृष्णबहादुर १३ पटकसम्म कारबाही भोगिसकेका प्रहरी कर्मचारी हुन्। सोमबार महाराजगञ्जको प्रहरी कार्यालयबाटै उनलाई पक्राउ गरिएको हो।
