रामेछाप: मन्थली नगरपालिकामा ‘दलित महिलालाई पञ्चेबाजा बजाउन सिकाउने’ १० दिने तालिम मंगलबारदेखि सुरु भएको छ। मन्थली नगरपालिकाको आर्थिक सहयोग तथा पञ्चेबाजा संरक्षण समाज जिल्ला कार्य समिति रामेछापको आयोजनामा मन्थलीस्थित तीनलाल पार्कमा तालिमको उद्घाटन मन्थली नगरपालिका प्रमुख लव श्रेष्ठले गरेका हुन्।
उद्घाटन सत्रमा बोल्दै प्रमुख अतिथिका रूपमा रहेका नगरप्रमुख श्रेष्ठले पञ्चेबाजा पेसालाई व्यावसायिक कलाको रूपमा स्थापित गर्नुपर्नेमा जोड दिनु भयो। उनले तालिममा सहभागी हुनेहरूलाई पछि एक सेट बाजा उपलब्ध गराउने आश्वासन पनि दिए। कार्यक्रममा सहभागीहरूसँगै नगरप्रमुख श्रेष्ठले बाजा बजाएर प्रशिक्षार्थीहरूलाई उत्साहित समेत गराए।
श्रेष्ठले भने, “तपाईं हामी सबैबाट संकलित करबाट खर्च गरिन्छ, तपाईंहरूले यसलाई व्यावसायिक कलाको रूपमा अघि बढाउनुहोस्। आवश्यकता परेमा हामी थप सहयोग गर्नेछौं।”
कार्यक्रममा मन्थली नगरपालिका वडा नं. १ का कार्यवाहक वडा अध्यक्ष चन्द्र बहादुर माझी र रामेछाप उद्योग वाणिज्य संघका सचिव यज्ञ सुबेदीले पनि यो पेसालाई सबै क्षेत्र र समुदायमा विस्तार गर्नुपर्ने बताए।
राष्ट्रिय दलित पत्रकार संघ जिल्ला कार्य समिति रामेछापका अध्यक्ष नवराज विश्वकर्माले दलित समुदाय आफ्ना मौलिक पेसालाई व्यवस्थित रूपमा अघि बढाउनुपर्नेमा जोड दिए। उनले विभेद र उत्पीडनका कारण समुदायले आफ्नो मौलिक पेसा छोड्नुपरेको बताए।
विश्वकर्माले भने, “हिजो दलित समुदायलाई विवाह, व्रतबन्ध जस्ता कार्यक्रममा बाजा बजाउन बोलाइन्थ्यो, तर खाना खाने बेला अछुत भनेर छुट्टै राखिन्थ्यो। आज पनि यो समुदाय उत्पीडनमा छ। यसले गर्दा समुदाय मौलिक पेसाबाट विस्थापित हुँदैछ।”
पञ्चेबाजा संरक्षण समाज रामेछापका अध्यक्ष गोपाल नेपालीले यो तालिम सुरुवात मात्रै भएको र आगामी दिनमा आवश्यकताको आधारमा थप तालिम सञ्चालन गरिने बताए। समाजका संस्थापक अध्यक्ष ज्ञानबहादुर सुन्दासले तालिमको उद्देश्य मौलिक लोक धुन र बाजाहरूको संरक्षण गर्नु रहेको बताए। तालिममा मन्थली नगरपालिकाका विभिन्न वडाका १० जना दलित महिलाहरूको सहभागिता रहेको छ।
