सम्मानित पोखराका पुलेन्द्रमान श्रेष्ठको जन्म वि.सं. २००१ साल माघ १९ गते पोखराको कुँडहरमा भएको थियो । उनका पिता २००७ सालका योद्धा भएकाले पनि त्यसको गहिरो प्रभाव पुलेन्द्रमानमा पर्नु स्वभाविकै थियो । पिता स्व. दुर्गामान श्रेष्ठ सामाजिक कार्यकर्ता, राजनैतिक सुझबुझ भएका व्यक्ति थिए । २०१५ सालमा भएको पहिलो आम निर्वाचनमा नेपाली काँगे्रसका उम्मेदवार पूर्व उपमन्त्री मिनबहादुर गुरुङका पक्षमा प्रचारप्रसार गरेका दुर्गामान निर्वाचन पछि गठन भएको सुकुम्बासी आयोगमा कोषाध्यक्ष बनाइएका थिए । २०१७ पौष १ गते राजा महेन्द्रले शासन आफ्नो हातमा लिएपछि पिता दुर्गामानलाई तत्कालीन प्रशासनले दिएको यातनाले पुलेन्द्रमानको हृदयमा नराम्रो प्रभाव प¥यो र पञ्चायती व्यवस्था विरुद्धमा लाग्न अन्तर्मन देखि नै पे्ररणा दियो ।

भाइ यज्ञमान श्रेष्ठले भैरहवामा व्यापार विस्तार गर्दै लान थालेपछि २०२५ सालमा उनी सघाउन भैरहवामा गए । २०३५ सालमा पुलेन्द्रमान पोखरामा फर्किएर राजनीतिक संगठनमा आवद्ध भए । २०३५ साल मार्ग १३ गते नेपाली काँगे्रसका नेता विश्वेश्वरप्रसाद कोइराला पोखरा आउने क्रममा स्वागतका लागि एयरपोर्ट पुगेका थिए । सो दिन अघि नेता धीरबहादुर गुरुङको घरमा केही पञ्चहरुले नेपाली काँगे्रसका नेता करुणानिधि कोइरालाका सेताम्य दारी समातेर उखेल्ने र कालोमोसो दल्ने कार्यले उनको चित्त नराम्ररी दुःखेको थियो । प्रतिबन्धित नेपाली काँगे्रस पोखरा नगर समितिका सदस्य श्रेष्ठ उनी पोखरामा भएको त्यो कालो दिन (मार्ग १३) लाई जीवनमा कहिल्यै बिर्सन सक्दैनन् । त्यसबेला वि.पी. कोइराला चढेको विमानलाई पोखरा उत्रन नदिँदा पोखरा अवतरण नगरी काठमाडौंमा नै फिर्ता जानु परेको थियो ।

२०३६ साल वैशाखमा विद्यार्थी आन्दोलन चर्काउन श्रेष्ठ लगायत नेपाली काँगे्रसका नेताहरु लागि परे । २०३६ सालमा जनमत संग्रहको घोषणा भएपछि बहुदल प्रचारप्रसारमा सक्रिय भै गाउँगाउँमा गई पार्टी सङ्गठन विस्तारको कार्यमा जुटे । कास्की जिल्लामा बहुदल पक्ष भारी भएता पनि समग्र मुलूकको जनमत संग्रहमा बहुदलभन्दा निर्दलपक्ष ४ लाख मतले विजयी भएको घोषणा भयो । जनमत संग्रहपछि पार्टीका गतिविधि गर्न केही सहज भएपनि प्रशासनिक यातनाका शिकार भने भइरहनु पर्ने अवस्था विद्यमान नै थियो । ०४२ सालमा पार्टीको आव्हानमा भएको सत्याग्रह कार्यक्रममा सक्रियतापूर्वक लागेका श्रेष्ठ ०४६ सालमा विपी जयन्तीमा सहभागी भएको आरोपमा स्याङ्जा जेलमा २४ दिन बिताउनुपरेको उनी बिर्सदैनन् । ०४६ सालको आन्दोलनमा श्रेष्ठ नेपाली काँगे्रस पार्टी कार्यालयबाटै २०४६ फाल्गुण १ गते पक्राउ परेका थिए । ०४६ साल चैत्र २६ गते बहुदलको घोषणा भएपछि उनी लगायत सबै नेता तथा कार्यकर्ता रिहाई भए । पोखरामा पनि बहुदल प्राप्ति भएपछि विजय जुलुस निस्केको थियो । श्रेष्ठका लागि सो दिन सर्वाधिक खुसीको दिन थियो ।

प्रजातन्त्र प्राप्ति भएपछि स्वतन्त्रता सेनानि श्रेष्ठलाई विभिन्न पदमा अफरहरू प्राप्त भयो । उनलाई स्थानीय निकायमा चुनाव लड्ने अवसर दिइयो तर अरूलाई यो अवसर प्रदान गरे । उनी ०४५ सालबाट ०७५ सालमा पटक पटक गरी १५ वर्ष नेपाली काँगे्रस कास्कीको सदस्य भए । ०५९ सालमा कास्की क्षेत्र २ मा क्षेत्रीय सभापतिको जिम्मेवारी बोकेका श्रेष्ठले ०६२/०६३ को तेस्रो जनआन्दोलनमा पनि सक्रियतापूर्वक भाग लिएका थिए ।

उनी एक निष्ठावान कार्यकर्ताका रूपमा चिनिन्छन् । व्यक्तिगत लोभलालच, मोहभन्दा माथि उठेका श्रेष्ठ जस्तालाई सार्वजनिक रूपमा सम्मान हुने खबरले पुराना, ईमान्दार, निष्ठावान् कार्यकर्तामाझ खुशीको लहर चल्नु स्वभाविकै छ । वास्तवमा पुलेन्द्रमान जस्ता नेता कार्यकर्ता पाउनु नेपाली काँगे्रस जस्तो पुरानो पार्टीका लागि गौरवको विषय हो ।

उनको विवाह २०१९ सालमा पूर्णमायासँग भएको थियो । श्रेष्ठ सर्वोच्च नेता गणेशमान सिंहप्रति भावपूर्ण श्रद्धासुमन व्यक्त गर्दै नेता सिंह पोखरा आउँदा जहिले पनि आफ्नो कुँडहरको घर आउने गरेको र पारिवारिक माया, ममता, स्नेह दिने गरेको पुराना दिन सम्झदै भन्दछन्– वास्तवमा गणेशमान युगपुरुष नै हुनुहुन्छ ।