पोखरा

गण्डकी प्रदेशको राजधानी पोखरा महानगरपालिका ६ बुलौदीमा रहेको पोखरा इभेन्ट सेन्टरमा मा यही जेठ २१ र २२ गते श्रमाधान रोजगार मेला हुने भएको छ । पत्रकार सम्मेलनमार्फत आयोजकले मेला आयोजना गर्न लागेको जानकारी दिए । उक्त मेलाको प्रारम्भीक तयारी पूरा भएको समेत पत्रकार सम्मेलनमार्फत जानकारी गराए ।

नेपाल सरकार, श्रम रोजगार तथा सामाजिक सुरक्षा मन्त्रालय, सामाजिक विकास तथा स्वास्थ्य मन्त्रालय गण्डकी प्रदेश र पोखरा महानगरपालिकाले संयुक्त रुपमा आयोजना गरेको मेलाको संयोजन होटल संघ नेपाल (हान) र सह– आयोजकहरुमा नेपाल उद्योग बाणिज्य महासंघ, नेपाल चेम्बर अफ कमर्श, नेपाल घरेलु तथा साना उद्योग महासंघ, नेपाल तालिम तथा रोजगार व्यवसायी महासंघ लगायतका सरोकारवाला संस्थाहरु रहेको बताए ।

आन्तरिक रोजगारी प्रवर्द्धन र वैदेशिक रोजगारीलाई सुरक्षित बनाउने, श्रम र रोजगारको क्षेत्रमा रहेका बहुआयामिक समस्याहरुलाई एकद्वार प्रणालीबाट सम्बोधन गर्दै रोजगारीको लागि अनुकुल वातावरण सृजना गर्नु अहिलेको आवश्यकता देखिएको भन्दै सरकारले ७ वटै प्रदेशमा श्रमाधान रोजगार मेला २०८१ आयोजना गर्दै आएको आयोजकले बताए ।

मेलामा विभिन्न प्रकारका बुथ तथा स्टलहरु रहनेछ । जसमा बायोडाटा निर्माण सिकाइ बुथ, विभिन्न रोजगारदातासँग सम्बन्धित बुथ, बैदेशिक रोजगार बुथ, कल सेन्टर बुथ लगायतका कम्तिमा ३५ वटा स्टल तथा बुथहरु हुनेछन् । प्रदेश भित्रका ठूला सम्भावित रोजगारदाताको पहिचान गरेर सरकारी तर्फबाट ८ देखि १० वटा र निजी क्षेत्रका २० देखि २५ वटा स्टलहरु रहने बताए ।

मेलाले श्रमिक तथा रोजगारदाताहरुलाई जोड्ने तथा रोजगारदाताहरु र विभिन्न क्षेत्रका सरोकारबालाहरुलाई एकै ठाँउमा ल्याएर श्रमाधान कार्यक्रमले नेटवर्किङ र रोजगारीको लागि अनुकुल वातावरण तयार गर्ने विश्वास गरेको छ । रोजगारीको वातावरण बनाउँदै निजी क्षेत्रमा रोजगारी सृजना तथा प्रबद्धन गर्न आवश्यक सीप विकासमा सहयोग पुग्नेछ । त्यस्तै दक्षता अभिवृद्धि गर्दै रोजगारीको खोजीमा रहेकाहरुलाई सीप र रोजगारसँग प्रत्यक्ष जोड्ने वातावरण तयार गर्नेछ ।

श्रमाधान मेलाले रोजगारदाता र रोजगारीको खोजीमा रहेका यूवाहरुको सम्बन्धमा डाटाबेश निर्माण गर्ने, रोजगारदाताहरुको सूचीकरण र रोजगारीका अवसरको पहिचान हुने, नेपालको रोजगारीको परिदृश्यका बर्तमान सन्दर्भमा देखिएको खाडल आवश्यकता अनुकुल जनशक्ति प्राप्त गर्न र युवाहरु वैदेशिक रोजगारीमा जान बाध्य रहेको अवस्थामा आन्तरिक रोजगार प्रवद्र्धन गर्न सकारात्मक योगदान दिने आयोजकले बताए ।

श्रम र रोजगारसँग सम्बन्धित सो कार्यशाला गोष्ठी तथा अन्तरकृया कार्यक्रम हुने जसमा सीप विकास तथा क्षमता अभिवृद्धि, सामाजिक सुरक्षा, सुरक्षित आप्रवासन, श्रम कानून र रोजगारदाता तथा रोजगारि खोजी गर्नेको आवश्यकता सम्बन्धि अन्तरक्रिया र स्थानीय संस्कृति झल्किने खालका सांस्कृतिक कार्यक्रम समेत हुने आयोजकले बताए ।

श्रमाधान रोजगार मेलामा सहभागी हुन आउने इच्छुक व्यक्तिले अनलाइन दर्ता प्रणाली https://shramadhan.moless.gov.np/rojgarmela/ मार्फत रोजगारदाता मेलामा सुचीकरण हुन सक्ने र रोजगारीको खोजीमा रहेका व्यक्तिले दर्ता गर्न समेत सकिने व्यवस्था रहेको छ । साथै मेलाको भ्रमण गर्न आउनु हुने व्यक्तिले मेलामा नै स्वयम म्यानुअलमा र अनलाइनबाट समेत दर्ता गर्न सकिने व्यवस्था रहेको आयोजकले जनाकएको छ ।