पोखरा

पोखरा महानगरपालिका वडा नम्बर १० भित्र रहेका आमा समुहका अध्यक्ष र सचिवहरुलाई लक्षित गरी दुईदिने महिला सशक्तीकरण कार्यक्रम सम्पन्न भएको छ । पोखरा जेसिसको ब्यवस्थापनमा वडा भित्र रहेका ४० वटा आमा समुहका अध्यक्ष र सचिवहरुको उपस्थिती रहेको उक्त कार्यक्रमको समापन गर्दै पोखरा महानगरपालिका वडा नम्बर १० का अध्यक्ष राजेश गुरुङले आमा समुहमा आवद्ध दिदीबहिनीहरुको क्षमता अभिवृद्धि गर्ने उद्देश्यले महिला शसक्तिकरण कार्यक्रमको आयोजना गरिएको वताए ।

तालिम अन्तर्गत बिहीबार आमा समुहका सचिवहरुलाई उद्घोषण तालिम र शुक्रबार कानुनी परामर्श र पञ्जीकरण सम्बन्धी तालिम प्रदान गरिएको बताउदै अध्यक्ष गुरुङले महिला दिदीबहिनीहरुका लागि आगामी दिनमा पनि ब्यूटीपार्लर तालिम, कौशी खेती तालिम युवाहरुका लागि कपाल काट्ने तालिम र वडा भित्रका टोल बिकास संस्थाहरु बीच फुटवल प्रतियोगिताको समेत आयोजना गर्दै वडा भित्रका बासिन्दालाई लक्षित गरी आत्मनिर्भर बनाउने गरी तालिमहरुको आयोजना गरिने अध्यक्ष गुरुङले जानकारी दिए ।

दुई दिन सम्म सञ्चालन भएको उक्त कार्यक्रममा अधिवक्ता भगवती पहारी, ग्लोबल आइएमई बैंकका पूर्णिमा आले, पोखरा जेसिसका अध्यक्ष देवराज शर्मा, वडा सचिव दमयन्ती पराजुली, जेसिसका गणेश गिरी, विजय बराल लगायतले सहजीकरण गरेका थिएभने कार्यक्रममा वडा भित्रका ४० वटा आमा समुहका अध्यक्ष र सचिवहरुको सहभागीता रहेको थियो ।