पोखरा, १५ फागुन ।
नेपाल आदिवासी जनजाति पत्रकार महासंघ (फोनिज) कास्कीले नेपाल पत्रकार महासंघ कास्कीलाई सात दिने अल्टिमेटम र ज्ञापनपत्र बुझाएको छ ।
नेपाल पत्रकार महासंघको संस्थापक अध्यक्ष सत्य नारायण बहादुर श्रेष्ठ हुनपर्ने मागसहित मंगलबार फोनिज कास्कीका अध्यक्ष दीलप्रसाद गुरुङले नेपाल पत्रकार महासंघ कास्की मार्फत केन्द्रलाई पत्र बुझाएको हो । महासंघ कास्कीका तर्फबाट अध्यक्ष विमला भण्डारीले उक्त पत्र बुझेका हुन् ।
फोनिज लामो समयदेखि नेपाल पत्रकार महासङ्घको गलत इतिहास सच्याउन संघर्षरत रहेको छ । तथ्य र प्रमाणका आधारमा महासंघको संस्थापक अध्यक्ष सत्यनारायणबहादुर श्रेष्ठलाई कायम गर्न २०७९ सालमा नेपाल पत्रकार महासङ्घका सबै समितिमार्फत माग गरिएको थियो ।
त्यसैको स्मरण गर्दै फोनिज कास्कीले पुनः स्मरणपत्र बुझाएको हो । सर्वमान्य इतिहास स्वीकार्न नेपाल पत्रकार महासंघ तयार नभएका कारण फोनिजले निर्णायक आन्दोलनको चरणमा पुग्दै ७ दिने अल्टिमेटम बुझाएको हो । अल्टिमेटममा ७ दिनभित्र सत्यनारायण बहादुर श्रेष्ठलाई नेपाल पत्रकार महासङ्घको संस्थापक अध्यक्ष कायम गर्न माग गरिएको छ । माग पूरा नभए नेपाल पत्रकार महासङ्घका केन्द्रसहित देशैभरका कार्यालयहरुमा अनिश्चितकालीन तालाबन्दी गरिने जानकारी पनि गराएको छ ।
नेपाल पत्रकार महासंघ कास्कीका अध्यक्ष विमला भण्डारीले फोनिजको माग सहितको ज्ञापन पत्र तत्काल केन्द्रमा पठाउने बताइन् । पत्रकार बिचको सद्भाव खलल हुन नदिनका लागि आफ्नो तर्फबाट प्रयास रहने उनले सुनाइन् ।
