धनुषामा तीन दिनदेखि हराइरहेकी धनुषाको सबैला नगरपालिका ९ कुसमहा सतोखरकी ६ वर्षीया बालिका राखी यादवको शव सतोखर पोखरी नजिक पानी जमेको खाल्डोमा नग्न अवस्थामा फेला परेको हो । उनले लगाएका कपडा खाल्डो छेउमा फेला परेको छ ।
शवको प्रकृति हेर्दा बलात्कारपछि उनको हत्या भएको आशंका स्थानीयले गरेका छन्। प्रहरीले भने यस विषयमा केही भनेको छैन।
शवको पोष्टमार्टमपछि मात्रै बलात्कार गरेर हत्या भए नभएको खुल्ने डीएसपी रञ्जन अवाले बताए । प्रहरीका अनुसार बुधबार साँझ आमासँगै ती बालिका घरबाट एक किमी उत्तरमा रहेको सबैला ९ मा मटकोर हेर्न गएकी थिए। विवाह पञ्चमीको अवसरमा निकालिएको रथ यात्रा हेर्न गएदेखि ती बालिका बेपत्ता भएकी थिइन्।
भोलिपल्ट (बिहीबार) बिहान ९ बजेमात्रै बालिका हराएको अभिभावकले प्रहरीलाई जानकारी गराएका थिए। प्रहरीले बालिकाका आफन्त, जनप्रतिनिधि र स्थानीयवासीलाई साथमै लिएर बालिकाको खोजी गरेको थियो। बालिकालाई खोज्ने क्रममा तालिम प्राप्त कुकुर पनि परिचालन गरिएको डीएसपी अवाले बताए।
बालिकाको हत्यामा संलग्न भएको आशंकामा प्रहरीले दुईजना स्थानीयलाई नियन्त्रणमा लिएर सोधपुछ सुरु गरेको छ। उनीहरुको नाम भने प्रहरीले सार्वजनिक गरेको छैन। डीएसपी अवाले बालिका हत्याको विस्तृत विवरण पछि सार्वजनिक गरिने जानकारी दिए।
