दोर्दी गाउँपालिका– २ का रामबहादुर गुरूङले नवलपरासी कावासोती नगरपालिका– ८ का सुरेन्द्र पाण्डेसँग गरेको समलिङ्गी विवाह मङ्सिर १३ गते कानुनी रूपमा दर्ता भएको छ । यो नेपालकै मात्र नभएर दक्षिण एसियाकै पहिलो कानुनी मान्यता प्राप्त भएको समलिङ्गी विवाह हो ।

उहाँहरुले २०७४ असाेज २७ गते सामाजिक परम्परा अनुसार विवाह गर्नुभएकाे थियाे । तर गाउँपालिकाले विवाह दर्ता गर्न नमानेपछि उहाँहरुले राष्ट्रिय परिचयपत्र तथा पञ्जीकरण विभागमा उजुरी दिनुभएको थियो । विभागले सर्वोच्च अदालतको आदेश अनुसार अस्थायी अभिलेख रहने गरी विवाह दर्ता गर्न निर्देशन दिएको थियो ।

सर्वोच्च अदालतले समलिङ्गी विवाह दर्ताको व्यवस्था गर्न गत असारमा सरकारलाई अन्तरिम आदेश दिएको थियो । यसअघि विवाह दर्ता गर्ने सरकारी निकायले कानुन अभाव देखाउँदै समलिङ्गीहरूको विवाह दर्ता अस्वीकार गर्दै आएकाे थियाे । त्यस्तो अवस्थामा समलिङ्गी जोडीले आर्थिक, सामाजिक, सांस्कृतिक, स्वास्थ्य सेवा, सम्पत्ति लगायतका व्यवहार र कारोबारमा अड्चन खेप्दै आउनु परेको थियो ।

सर्वोच्च अदालतले संविधानले नागरिकलाई लैङ्गिक पहिचान सहितको नागरिकता प्राप्त गर्ने अधिकार सुनिश्चित गरेको र विवाह गर्ने स्वतन्त्रता हुने कानुनी आधार उल्लेख गरेको छ