अछाम प्रहरीले श्रीमानलाई पक्राउ गरेको छ। पक्राउ पर्नेमा मंगलसेन नगरपालिका– ३ लाछिमानाका शेरबहादुर भण्डारी रहेका छन्।
उनले मदिरा सेवन गरी कुटपिट गरेर ३७ वर्षीया श्रीमती उर्मिला भण्डारीको हत्या गरेको प्रहरीको आशंका छ। मृतक उर्मिलाको टाउकोमा गहिरो चोट देखिएको छ भने हातखुट्टा र शरीरका अन्य भागमा समेत नीलडाम देखिएको जिल्ला प्रहरी कार्यालय अछामका प्रमुख प्रहरी नायब उपरीक्षक (डिएसपी) सन्तोष पाठकले बताए।
डिएसपी पाठकका अनुसार कात्तिक २९ गते राति उर्मिला आफ्नै घरमा मृत भेटिएकी थिइन्। स्थानीयका अनुसार त्यो दिन शेरबहादुर मदिरा सेवन गरेर राति साढे १० बजेपछि घर छिरेका थिए। त्यसको केही समयमै उर्मिला मृत भेटिएको भन्दै वडाध्यक्ष बिर्खबहादुर बोगटीले फोन गरेपछि प्रहरीले घटनास्थल पुगेर उनका श्रीमानलाई नियन्त्रणमा लिएको डिएसपी पाठकले बताए।
