जिल्लामा दुई वर्षको अवधिमा यौन हिंसाका घटनाबाट ३ सय १७ जना महिला पीडित भएको तथ्याङ्क रहेको छ । आर्थिक वर्ष ०७९ / ०८० मा २ सय ३ जना र आर्थिक वर्ष ०७८ / ०७९ मा १ य १४ जना महिला यौन हिंसाबाट पीडित भएको तथ्याङ्क जिल्ला अदालत, कैलालीकोमा रहेको छ ।
अघिल्लो आर्थिक वर्षको तुलनामा गतवर्ष थप महिलाहरु यौन हिंसाबाट पीडित भएको पाइएको छ । आर्थिक वर्ष २०७९ / ०८० मा दर्ता भएका २ सय ३ ओटा यौनजन्य अपराधका मुद्दा मध्ये बलात्कार अन्तर्गत ९७, बलात्कार प्रयासमा ७९, यौन दुर्व्यवहारका २१ र हाडनातामा बलात्कारका ६ ओटा मुद्दा जिल्ला अदालत, कैलालीमा दर्ता भएका छन् । महिलामैत्री कानुन, जनचेतनाको विकास र शिक्षामा महिलाहरुको पहुँच अभिबृद्धि भएकै कारण अदातलमा उजुरी दिने महिलाहरुको सङ्ख्यामा बृद्धि भएको जिल्ला अदालत, कैलालीका तहशिलदार नेत्रबहादुर माझीले बताउनु भयो ।
उहाँले भन्नु भयो–‘बालविवाहका मुद्दा बलात्कार अन्तर्गत दर्ता हुने प्रचलन बढेको छ । महिलाहरुको शरिरमाथिको अधिकारलाई बढावा दिइएको कारण वैवाहिक बलात्कारका मुद्दा बढीरहेका छन् । हाडनाता करणीका घटनामा बृद्धि भएको छ । महिला तथा बालबालिका घरभित्र पनि असुरक्षित छन् । जसका कारण यौनजन्य अपराधका घटनामा बृद्धि भएको देखिन्छ ।’
इन्सेकले प्रकाशन गर्दै आएको नेपाल मानव अधिकार वर्ष पुस्तकमा उल्लेखित तथ्याङ्कले पनि महिला अधिकार हनन्का घटनाहरुमा बृद्धि हुँदै गएको पाइएको छ । नेपाल मानव अधिकार वर्ष पुस्तक २०२२ मा १ सय ८० जना महिलाको अधिकार हनन् भएको पाइएको छ । घरेलु हिंसाबाट १ सय २५ जना, बलात्कारबाट २२ जना, बलात्कारको प्रयासबाट आठ जना, यौन दुर्व्यवहारबाट एक जना, वहुविवाहबाट १८ जना, बेचबिखन तथा ओसारपसारबाट पाँच जना र बोक्सीको आरोपमा एक जना गरी १ सय ८० जना महिला पीडित भएका छन् ।
बलात्कारबाट १८, यौन दुर्व्यवहारबाट सात र बेचबिखन तथा ओसारपसारबाट पाँच जना गरी ३० जना बालिकाको अधिकार हनन् भएको नेपाल मानव अधिकार वर्ष पुस्तक २०२२ मा उल्लेख गरिएको छ । यसैगरी नेपाल मानव अधिकार वर्ष पुस्तक २०२३ मा २ सय ४२ जना महिला र ४० जना बालबालिकाहरुको अधिकार हनन् भएको उल्लेख छ ।
