शुक्रबार बिहानकाे दुर्घटना एउटा ट्रक कोशीको पुलबाट खस्यो यियाे । दुई भारतीय पत्रकारहरु (एक पुरुष र एक महिला) सहीत कोशी व्यारेजमा देखिए । उनीहरूले रिपोर्टिङका नाममा त्यहाँ ड्यूटीमा रहेका प्रहरीहरूलाई केरकार गर्न थाले ।
प्रहरीले नजान्ने भाव व्यक्त गरेपछि पत्रकार फेरि क्यामरातिर फर्किएर चिच्याउँछन्, ‘देखिए, यहाँकी पुलिसको हिन्दी नहीँ आति ।’ त्यस स्थानमा रिपोर्टिङ गर्न पुगेका , विराटनगरका पत्रकार सोनुकुमार दास भारतीय पत्रकारको प्रस्तुति देखेर उनलाई ओडाहा भयो । त्यसपछि उनले दुर्घटना भएकाे स्थानकाे रिपोर्टिङ गर्न छाेडेर ती पत्रकारमाथि नै रिपोर्टिङ गर्न सुरू गरे ।
पुरुष पत्रकारलाई बुम तेर्स्याउँदै सोनुले सोधे, ‘तपाईंहरूले नेपालमा रिपोर्टिङ गर्न अनुमति लिएर आउनुभएको हो ?’ भारतीय पत्रकारले जवाफ दिए, ‘मैले प्रशासनमा गाडी राखेँ र रिपोर्टिङ गरेर आउँछु भनेर आएँ ।’ सोनुले सोधे, ‘प्रशासनले अनुमति दिएको कुनै प्रमाण छ तपाईंसँग ?’
ती पत्रकारले कुनै प्रमाण देखाउन सकेनन् । बरु फलाक्न थाले, ‘हेर्नुस्, नेपाल र भारतको रोटी बेटीको सम्बन्ध छ…’ तर, उनले आफ्नो कुरा सकाउन नपाइकन उनकी सहयोगी महिला पत्रकार बम्किन थालिन् । महिला पत्रकार सोनुसँग उनको विवाद सुरू भयो । सोनुले आफू नेपाली पत्रकार भएको भन्दै भारतबाट आएर रिपोर्टिङ गर्न प्रशासनको अनुमति चाहिने दोहोर्याए ।
त्यसपछि महिला पत्रकारले भनिन्, ‘तपाईंसँग नागरिकता छ ? देखाउनुस्।’ सोनुले आफ्नो परिचयपत्र देखाउँदै भन्छन्, ‘म नेपालको हुँ, तपाईं कहाँको हुनुहुन्छ ?’
त्यसपछि ती महिला होस गुमाउँछिन् र सोनुलाई अपशब्दसहित अश्लिल इशारा गर्छिन् । यति मात्र होइन, सोनूले आफूलाई गलत तरिकाले छोएको आरोपसमेत लगाउन भ्याउँछिन् । पुरुष पत्रकार पनि उनलाई साथ दिन्छन् । उनीहरूले सोनुको क्यामरा खोस्न प्रयास गर्छन् । नसकेपछि भिडिओ डिलिट गर्न आदेश दिएका थिए । ‘आफैं अश्लील शब्दहरू प्रयोग गर्ने, उल्टै छोएको आरोप लगाउने ?’ भन्दै स्थानीयहरू जाइलागेपछि भारतीय पत्रकार पछि हटेका थिए ।
क्यामरा तिर फर्केर भारतीय पुरुष पत्रकार भन्छन्, ‘देखिए, ऐसे पत्रकार है जिसको हिन्दी बोलना नहीँ आता ।’ त्यसपछि उनीहरू दुवै त्यहाँबाट भागे। भारतीय पत्रकार सँगकाे लफडा भइरहँदा घटनास्थलमा प्रहरीको उपस्थिति भने देखिएको थिएन । यस विषयमा हामीले पत्रकार सोनु दाससँग कुरा गर्दा उनले प्रहरी निरिह बनेको आरोप लगाए ।‘प्रहरी नजिकै थिएँ, तर भारतीय पत्रकारले दादागिरी देखाउँदा उनीहरू निरिह बनेर बसिरहे,’ उनले भने । प्रहरीले हस्तक्षेप नगरेपछि सोनु आफैं प्रहरीसम्म पुगेका थिए । उनले भने, ‘मलाई पनि पक्राउ गर्नुस् र तिनीहरूलाई पनि पक्राउ गरेर कारबाही गर्नुस् ।’ तर, प्रहरीले स्थानीयबासी आक्रोशमा रहेको र घटनाले उग्ररूप लिन सक्ने भन्दै लाचारी देखाएको सोनु बताउँछन् ।
भारतीय पत्रकारले सीमा क्षेत्रमा आएर दादागिरी देखाउने यो कुनै नयाँ घटना भने होइन । उनीहरू विना अनुमति नेपालमा आएर रिपोर्टिङ गर्दै यथार्थ भन्दा बाहिरी रिपोर्टिङ गर्दै आएका छन् । नेपाली प्रहरी-प्रशासनले स्थानीय मिडियालाई कडाइ गर्ने तर भारतीय मिडिया सामु लाचार देखिने गरेको स्थानीय सञ्चारकर्मीले गुनासाे पाेखेका छन् । नेपाली सञ्चारकर्मीले भारतमा अनुमति लिएर रिपोर्टिङ गर्दा पनि क्यामरा खोस्ने र भिडिओ डिलिट गर्न लगाउने गरिएको सोनु बताउँछन् ।
