उच्च अदालत जनकपुरको वीरगञ्ज इजलासले नेपाली कांग्रेसका नेता मोहम्मद अफताब आलमसहित चार जनालाई राजपुर बमकाण्डसम्बन्धी अभियोगमा सफाइ दिएको छ।
बुधवार न्यायाधीश खुसीप्रसाद थारू र अर्जुन महर्जनको संयुक्त इजलासले जिल्ला अदालत रौतहटको फैसला उल्टाउँदै आलम र अन्य तीन जनालाई सफाइ दिएको हो।
रजिस्ट्रार दीपक भण्डारीका अनुसार, ‘वारदात पुष्टि हुन नसकेकाले जिल्ला अदालतको फैसलालाई उल्टाउँदै उच्च अदालतले उनीहरूलाई सफाइ दिएको हो।’ सफाइ पाउनेमा अफताब आलमका भाइ मोहम्मद महताव आलम, शेख सेरोज भनिने शेख सराज र बद्री सहनी छन्।
उनीहरूमाथि २०६४ साल चैत २७ गते संविधानसभा निर्वाचनको अघिल्लो साँझ बम विस्फोट भएको घटनापछि ज्यान मार्ने उद्योग, विष्फोटक पदार्थको प्रयोग तथा कर्तव्य ज्यानको अभियोगमा मुद्दा चलाइएको थियो।
अनुसन्धानका क्रममा विस्फोटमा घाइते र मृतकहरूलाई अफताब आलमको निर्देशनमा ट्रयाक्टरमा राखेर इँटाभट्टामा जलाइएको आरोप लागेको थियो। जिल्ला अदालत रौतहटले आलमसहितलाई दोषी ठहर गर्दै जन्मकैदको सजाय सुनाएको थियो।
हाल अफताब आलम नख्खु कारागारमा रहेका छन्।
